കണ്ണൂർ: തദ്ദേശ തെരഞ്ഞെടുപ്പ് അടുത്തിരിക്കെ കണ്ണൂർ പയ്യന്നൂരിൽ വിഭാഗീയത രൂക്ഷം. എൽഡിഎഫിന്റെ ഔദ്യോഗിക സ്ഥാനാർത്ഥിക്കെതിരെ സിപിഐഎം ബ്രാഞ്ച് സെക്രട്ടറി മത്സരരംഗത്ത്. പയ്യന്നൂർ നഗരസഭയിലെ 36-ാം വാർഡിലേക്കാണ് കാര നോർത്ത് ബ്രാഞ്ച് സെക്രട്ടറി വൈശാഖ് സി സ്വതന്ത്രനായി മത്സരിക്കുന്നത്.
കോൺഗ്രസ് (എസ്)ലെ പി ജയൻ ആണ് വാർഡിലെ എൽഡിഎഫ് സ്ഥാനാർത്ഥി. നേരത്തെ പയ്യന്നൂരിലെ വിഭാഗീയ പ്രവർത്തനങ്ങളുമായി ബന്ധപ്പെട്ട് പാർട്ടിയുടെ താക്കീത് നേരിട്ട ആളാണ് വൈശാഖ്. അതേസമയം ബ്രാഞ്ച് സെക്രട്ടറി വിമതനായി എത്തിയത് സിപിഐഎമ്മിന് തലവേദനയായി. വൈശാഖിന്റെ സ്ഥാനാർത്ഥിത്വം പിൻവലിക്കാൻ പാർട്ടി നേതൃത്വം ഇടപെടുന്നതായാണ് വിവരം.
സ്ഥാനാർത്ഥിത്വം പ്രാദേശിക സിപിഐഎം നേതാക്കളോടുള്ള എതിർപ്പ് കാരണമാണെന്ന് വിമത സ്ഥാനാർത്ഥി വൈശാഖ് സി റിപ്പോർട്ടറിനോട് പറഞ്ഞു. പാർട്ടിക്കോ പാർട്ടി നയത്തിനോ താൻ എതിരല്ല. ഒരു കാരണവുമില്ലാതെ തന്നെ ഡിവൈഎഫ്‌ഐ മേഖല കമ്മിറ്റിയിൽ നിന്ന് പുറത്താക്കി. ബ്രാഞ്ച് സെക്രട്ടറി സ്ഥാനത്തുനിന്ന് ഒഴിവാക്കണമെന്ന് അറിയിച്ച് ലോക്കൽ കമ്മിറ്റിക്കും ജില്ലാ കമ്മിറ്റിക്കും കത്ത് നൽകിയിട്ടുണ്ട്. സ്ഥാനാർത്ഥിത്വം വന്നതിനുശേഷം പാർട്ടിയിലെ ആരും തന്നെ ബന്ധപ്പെട്ടിട്ടില്ല. പ്രദേശത്തെ സിപിഐഎം പ്രവർത്തകരുടെ പിന്തുണ തനിക്കുണ്ട്. അവർ പറഞ്ഞത് അനുസരിച്ചാണ് സ്ഥാനാർത്ഥി ആയതെന്നും വൈശാഖ് പറഞ്ഞു.
Content Highlights: CPIM branch secretary contest against the official LDF candidate in Payyanur